मनहरीमा बालबालिकाको घरधुरी सर्वेक्षण

मनहरी । मकवानपुरको मनहरी गाउँपालिका वडा नम्बर ४ मा आधारभूत तह उमेर समूहका बालबालिकाहरूको अवस्था पहिचान गर्न बृहत् घरधुरी सर्वेक्षण कार्य  भएको छ। मनहरीस्थित पशुपतिनाथ माविको सेवाक्षेत्र भित्र रहेका बालबालिकाहरू शिक्षाको पहुँचमा भए/नभएको पत्ता लगाउने उद्देश्यले शनिबार उक्त सर्वेक्षण गरिएको हो।

टोलीले वडा नं. ४ अन्तर्गत पर्ने मसिने, गोलघर, स्याउली बजार, डोलबारी, माथिल्लो मसिने, सालघारी, दिवाली टोल, बर्रा टाँडी, काली खोला, दमार, ट्वाङ्ग्रा, सत्रघरे टोल, बनकरिया टोल र नयाँ बस्ती लगायतका क्षेत्रहरूमा पुगेर घरधुरी सर्वेक्षण गरेको हो। सर्वेक्षणका क्रममा विद्यालय जाने उमेरका (५ देखि १२ वर्षसम्मका) कति बालबालिका नियमित विद्यालय गइरहेका छन् र कति बालबालिका विद्यालय बाहिर छन् भन्ने वास्तविक तथ्याङ्क संकलन गरिएको छ।

पशुपतिनाथ माविका शिक्षक एवं पूर्व प्रधानाध्यापक भानुभक्त आचार्यका अनुसार विद्यालयको सेवाक्षेत्र भित्र कोही पनि बालबालिका शिक्षाको उज्यालो घामबाट बञ्चित नहोऊन् र उनीहरूको वास्तविक अवस्था पहिचान होस् भन्ने उद्देश्यले यो सर्वेक्षण गरिएको हो। विशेष गरी बनकरिया र अन्य सीमान्तकृत समुदायका बालबालिकालाई विद्यालयको पहुँचमा ल्याउन यसले महत्त्वपूर्ण भूमिका खेल्ने आचार्यले जानकारी दिनुभयो।

सर्वेक्षण किन गरिन्छ र यसको प्रभाव के पर्छ ?
कागजी अनुमानका भरमा नभई समुदायमै पुगेर गरिएको यस सर्वेक्षणले विद्यालय बाहिर रहेका बालबालिकाको पहिचान गरी उनीहरूलाई विद्यालय ल्याउन स्पष्ट मार्गचित्र प्रदान गर्नेछ। यसबाट प्राप्त तथ्याङ्कका आधारमा आगामी शैक्षिक रणनीति तय गर्न, विशेष भर्ना अभियान सञ्चालन गर्न र लक्षित वर्गका लागि छात्रवृत्ति वा अन्य प्रोत्साहनका कार्यक्रम ल्याउन स्थानीय तह र विद्यालयलाई मद्दत पुग्नेछ। अन्ततः यसले गाउँपालिकाको साक्षरता दर बढाउन र ‘अनिवार्य तथा निःशुल्क आधारभूत शिक्षा’ को सरकारी लक्ष्यलाई साकार पार्न ठूलो टेवा पुर्‍याउने विश्वास गरिएको छ।