आज रातिदेखि पश्चिमी भागमा निम्न चापीय प्रणालीको प्रभाव, चिसोबाट जोगिन आग्रह

हाल नेपालमा उल्लेखनीय मौसमी प्रणाली नभए पनि आज रातिदेखि नेपालको पश्चिमी भूभागमा पश्चिमी निम्न चापीय प्रणालीको प्रभाव रहने जनाइएको छ ।

देशको तराई भूभागमा बाक्लो हुस्सु र कुहिरो लागिरहेको र मध्ये तथा पश्चिमी पहाडी भूभागका केही स्थानमा सामान्य हुस्सु र कुहिरो लागेको जनाइएको छ ।

आज बुधबार दिउँसो देशको पूर्वी तथा पश्चिमी पहाडी भूभागमा आंशिक बदली रही अन्य भूभागमा मौसम सामान्यतया सफा रहने जनाइएको छ ।

पश्चिमी भूभागका थोरै स्थानहरुमा हल्का वर्षाको साथै पश्चिमी उच्च पहाडी तथा हिमाली भूभागका थोरै स्थानहरुमा हल्का हिमपातको सम्भावना रहेको जनाइएको छ ।

भोलि दिउँसो देशको मध्ये तथा पश्चिमी भूभागमा सामान्य बदली भई पूर्वी भू्भागमा आंशिक बदली रहने जनाइएको छ । मध्य तथा पश्चिमी भूभागका केही स्थानहरुमा हल्कादेखि मध्यम वर्षाको साथै पश्चिमी तथा मध्य उच्च पहाडी र हिमाली भेगका केही स्थानमा हल्का देखि मध्यम हिमपातको सम्भावना रहेको महाशाखाले जनाएको छ ।

राती देशको मध्य तथा पश्चिमी भूभागमा सामान्य देखि पूर्ण बदली रही पूर्वी भूभागमा आंशिक देखि सामान्य बदली रहने जनाइएको छ । मध्य तथा पश्चिमका केही स्थानहरुमा हल्का देखि मध्यम वर्षाका साथै पूर्वी पहाडी भूभागका थोरै स्थानहरुमा हल्का वर्षाको सम्भावना रहेको पूर्वानुमान गरिएको छ ।

उच्च पहाडी र हिमाली भेगका धेरैजसो स्थानहरुमा हल्का देखि मध्यम हिमपातको सम्भावना रहेको जनाइएको छ । मध्य तथा पश्चिमी उच्च पहाडी र हिमाली भेगका केही स्थानमा भारी हिमपातको सम्भावना औंल्याइएको छ ।

आउँदो शुक्रबार देशको मध्य तथा पूर्वी भूभागमा सामान्य देखि पूर्ण बदली रहने र पश्चिमी भूभागमा आंसिक देखि सामान्य बदली रहने जनाइएको छ । देशका केही स्थानमा हल्का देखि मध्यम वर्षाको संभावना रहेको र उच्च पहाडी र हिमाली भेगका धेरैजसो स्थानहरुमा हल्का देखि मध्यम हिमपातको सम्भावना रहेको जनाइएको छ ।

मध्य तथा पूर्वी उच्च पहाडी र हिमाली भेगका केही स्थानमा भारी हिमपातको सम्भावना रहेको जल तथा मौसम पूर्वानुमान महाशाखाले जनाएको छ ।

शुक्रबार राति देशभरी आंशिक देखि सामान्य बदली रहने र देशका थोरै स्थानहरुमा हल्का वर्षाका साथै उच्च पहाडी र हिमाली भेगका थोरै स्थानमा हल्का हिमपातको सम्भावना रहेको जनाइएको छ ।

मध्य तथा पश्चिमी भूभागमा हल्का देखि मध्यम वर्षाको साथै उच्च पहाडी र हिमाली भेगमा हल्का देखि मध्यम हिमपातको सम्भावना रहेको र तराई भूभागहरुमा बिहानी समयमा बाक्लो हुस्सु र कुहिरो लागेकोले ति स्थानहरुमा राम्रो सँग घाम नलाग्ने हुँदा चिसो रहने जनाइएको छ । तसर्थ चिसोबाट बच्ने उपायहरु अपनाउनु हुन साथै हवाइ तथा सडक यातायातमा पर्न सक्ने जोखिम र अन्य प्रभावहरुबाट बच्न सतर्कता अपनाउन महाशाखाले आग्रह गरेको छ ।