‘महापुरुष’को पहिलो गीत सार्वजनिक

नेपाली फिल्म ‘महापुरुष’को पहिलो गीत सार्वजनिक गरिएको छ। मदनकृष्ण श्रेष्ठ र हरिवंश आचार्य अभिनित यो फिल्मको ‘बा’बोलको लिरिकल गीत सार्वजनिक गरिएको हो।

गीत नवराज पराजुलीले लेखेका हुन्। गीतमा बाबु र छोरालाई भावनात्मक रुपमा जोड्न खोजिएको छ। सार्वजनिक गीतमा लय रिदम कँडेलको स्वर तथा संगीत छ।

गीतको भिडिओमा हरिवंशका साथै रवीन्द्र सिंह बानियाँ र डेब्यु अभिनेता अरुण क्षेत्री फिचर्ड छन्। फिल्ममा हरिवंश र अरुण बाबु–छोराको भूमिकामा देखिएका छन्। दुईको केमेस्ट्रीले दर्शकसँग अन्तरक्रिया गर्न सक्छ।

सामाजिक विषयवस्तुमा आधारित ‘महापुरुष’ फिल्म प्रदीप भट्टराईले निर्देशन गरेका हुन्। फिल्ममा कथा लेखन प्रदीपकै हाे।

कात्तिक ११ सार्वजनिक प्रदर्शनमा आउने यो फिल्ममा मदनकृष्ण, हरिवंश, रविन्द्र र अरुणसंगै गौरी मल्ल, अन्जना बराइली, राजाराम पौडेल, शिखा तामाङ, कोपिला थापा, शिरु विष्ट, कविता श्रेष्ठ, नरेन्द्र कंसाकार, सविन बास्तोला, नरेश पौड्याल, प्रेम पाण्डे, सुमन रिमाल, माधव अधिकारी, प्रकाश भट्टराई, घनश्याम जोशी, अर्जुन आचार्य, प्रज्वल पराजुली लगायतका कलाकारले अभिनय गरेका छन्।

दीपक बज्राचार्यले खिचेको फिल्ममा कालीप्रसाद बाँस्कोटा र रिदम कँडेलको संगीत, शंकर महर्जनको एक्सन र मित्र डी. गुरुङको सम्पादन छ। ​

षट्कोण आर्ट्सको ब्यानरमा निर्मित फिल्ममा कार्यकारी निर्माता रवीन्द्र सिंह बानियाँ हुन्। म्याक्स दिपेश खत्री फिल्मका निर्माता हुन्।