सन्दिप द हन्ड्रेडका लागि अनुबन्धन भएनन्

बाइलाइन नेपाल
२३ चैत्र २०७८, बुधबार ०८:२५

नेपाली राष्ट्रिय क्रिकेट टिमका कप्तान सन्दिप लामिछाने बेलायतको ‘द हन्ड्रेड’को ड्राफ्टमा बिक्रि हुन सकेनन्। न्यूनतम ६० हजार पाउण्ड मुल्य राखेका सन्दिपलाई कुनै पनि क्लवले टिममा अनुबन्ध नगरेका हुन्।

अघिल्लो सिजन ओभल इन्भिन्सिबल्समा अनुबन्ध भए पनि अन्तिम समयमा भिसाका कारण खेल्न नपाएका सन्दिपलाई यो पटक कुनै पनि टिमले रूची देखाएनन्।

दोस्रो संस्करणका रुपमा रहेको द हन्ड्रेड सन् २०२० मा नै हुने भनिएपछि कोभिडका कारण स्थगित भएको थियो। २०२१ मा प्रतियोगिता हुँदा सन्दिप श्रम स्विकृतीका कारण बेलायत पुगेर क्वारेन्टिन बसे पनि अन्तिममा खेल्न पाएका थिएनन् ।

यो पटक सन्दिपले विदेशी खेलाडीको कोटामा नाम दर्ता गरेर ड्राफ्टमा परेका थिए। तर मंगलबार भएको ड्राफ्टमा उनलाई कुनै पनि टिमले अनुबन्ध नगरेका हुन्। यस्तै डेभिड वार्नर, आरोन फिन्च, क्रिश गेल, बाबर अजाम पनि ड्राफ्टमा बिक्री भएनन्।

ड्राफ्टमा एसोसियट देशबाट नेदरल्याण्ड्स, स्कटल्याण्ड्, नामिबिया, यूएई, बर्मुडा, अमेरिकाबाट पनि खेलाडीसहित १६ बिभिन्न देशका २८४ जना इंग्ल्यान्ड बाहिरका खेलाडीले नाम दर्ता गराएका थिए।

प्रतियोगितामा सहभागी ८ टिमले यसअघिको सिजनकै आधारमा खेलाडीहरु रिटेन गरेका छन् भने कुल ४२ खेलाडीको स्थानका लागि मंगलबार ड्राफ्टमार्फत खरिद गरेका हुन्। बन्द ढोकामा भएको ड्राफ्टको आयोजना इंग्ल्याण्ड र वेल्स क्रिकेट संघले गर्दै आएको छ।

प्रतियोगितामा ब्रमिङघम फोक्सि, लण्डन स्प्रिट्स, म्यानचेस्टर ओरिजिनल्स, नर्दन सुपरचार्जर्स, ओभल, साउर्दन ब्रेभ, ट्रेन्ट रोकेट्स र वेल्स फायर टिमको सहभागिता रहेको छ। द हन्ड्रेड लिगको दोस्रो सिजन आगामी ३ अगस्टदेखि ३ सेप्टेम्बरसम्म सञ्चालन हुनेछ।

यसमा तपाइको मत

Your email address will not be published. Required fields are marked *


*