सडक दुर्घटनामा कलाकारको मृत्यु

सडक दुर्घटनामा रुपन्देहीमा एक कलाकारको मृत्यु भएको छ । बुटवल उपमहानगरपालिका र तिलोत्तमा नगरपालिकाको सीमामा पर्ने योगीकुटी नजिक कलाकार शोभाकर पन्तको मृत्यु भएको इलाका प्रहरी कार्यालय बुटवलले जनाएको छ ।

गएराति योगिकुटीबाट मगरघाटतर्फ जाँदै गर्दा उनी सवार लु ७० प १३५३ नम्बरको मोटर साइकल सडकमा रहेको खाल्डोमा खसेको थियो । उनलाई आज आइतबार आज बिहान स्थानीयले खाल्डोमै मृत अवस्थामा देखेपछि प्रहरीलाई खवर गरेका थिए ।

गुल्मी स्थायी घर भएका उनी रुपन्देही बस्दै आएका थिए । उनी बुटवलमा फोटोग्राफर र कलाकारिता क्षेत्रमा काम गर्दै आएका थिए ।