आठौँ प्रयासमा डोकोभित्र फेला परे २० वर्ष कैद तोकिएका फरार अभियुक्त

सामान्य विवादमा छिमेकीलाई मुटुमा चक्कु रोपेर हत्या गरेपछि रामेछापको दोरम्बा सैलुङ गाउँपालिका–४ घर भएका होम बहादुर थापा मगर भागेका थिए । २०४९ कार्तिक ५ मा छिमेकी गजुरे मगरको हत्यामा संलग्न होम बहादुरलाई प्रहरीले २८ वर्षपछि पक्राउ गरेको छ ।

गएराति १ बजेतिर उनलाई दोरम्बा सैलुङ गाउँपालिका–४ गौश्वरा स्थित घरबाट उनलाई पक्राउ गरिएको रामेछापका डिएसपी नवराज ढुंगानाले  बताए । २०५० फागुन १६ मा रामेछाप जिल्ला अदालतले उनलाई २० वर्ष कैद सजाय हुने फैसला गरेको थियो । फैसलापछि उनी फरार थिए ।

गौश्वरामा उनले जंगलमा घर बनाएका थिए । घर नजिक सुराक राखेर बस्ने गरेका होम बहादुर नयाँ मान्छे गाउँमा गएको सुराक पाएपछि जंगल तर्फ भाग्थे । तर, गएराति आठौँ पटकको प्रयासमा जिल्ला प्रहरी कार्यालय रामेछाप र इलाका प्रहरी कार्यालय टोकरपुरबाट खटिएको टोलीले घर घेरा हालेर उनलाई पक्राउ गरेका हुन् ।

प्रहरीले घर घेरा हालेपछि उनकी पत्नीले भनिन्–‘श्रीमान् घर नआएको धेरै भइसक्यो ।’ तर, घर खानतलासी गर्दा माथिल्लो तलामा उनी डोकोभित्र लुकेको अवस्थामा भेटिए । ५५ वर्षीय होमबहादुरलाई प्रहरीले मंगलबार अदालतमा उपस्थित गराउँदै छ ।

होम बहादुरसहित चारजना मिलेर गजुरेको हत्या गरेका थिए । हत्यामा संलग्न मध्येका स्थानिय चन्द्र बहादुर मगर र गंगा बहादुर मगर कैद भुक्तान गरेर छुटेका छन् । अर्का अभियुक्त टक बहादुर मगरको मृत्यु भैसकेको छ । चार जना मिलेर घोपेको चक्कुले मुटु छेडिएर गजुरेको मृत्यु भएको थियो ।