प्रधानमन्त्रीले राजीनामा दिएर निकासको बाटो खोल्नुपर्ने पक्षमा काँग्रेस

काठमाडौं । संवैधानिक इजलासले प्रतिनिधिसभा विघटनलाई बदर गरिदिएसँगै नेपालको राजनीतिक अध्यायले नयाँ मोड लिएको छ । प्रधानमन्त्री केपी शर्मा ओलीले गत पुस ५ गते प्रतिनिधिसभा विघटनका लागि राष्ट्रपतिसमक्ष गरेको सिफारिस र सोही सिफारिसका आधारमा राष्ट्रपति विद्यादेवी भण्डारीले प्रतिनिधिसभा विघटन गरी निर्वाचनको मिति तोकेको विषयलाई संवैधानिक इजलासले ‘असंवैधानिक’ ठहर गरेको हो ।

नेपाली काँग्रेसका प्रमुख सचेतक बालकृष्ण खाँण अब प्रधानमन्त्रीले राजीनामा दिएर निकासको बाटो खोल्नुपर्ने बताउँछन् । रातोपाटीसँग कुरा गर्दै उनले प्रधानमन्त्री केपी शर्मा ओलीले नैतिकताका आधारमा राजीनामा दिनुपर्ने बताए ।

‘उहाँ (प्रधानमन्त्री) ले प्रतिनिधिसभा विघटन गरी निर्वाचनको मिति तोक्न राष्ट्रपतिसमक्ष सिफारिस गर्नुभएको थियो,’ खाँणले भने, ‘तर अदालतले सो कदमलाई असंवैधानिक भनिसकेको अवस्थामा अब प्रधानमन्त्रीले नैतिक रुपमा राजीनामा दिनुपर्छ ।’