कोरोना संक्रमणपछि सन्दीप लामिछाने अस्पताल भर्ना
बाइलाइन नेपाल
कोरोना संक्रमण भएका नेपाली राष्ट्रिय क्रिकेट टोलीका सदस्य सन्दीप लामिछाने सोमबार अस्पताल भर्ना भएका छन् ।शनिबार गरिएको परीक्षणपछि उनलाई कोरोना संक्रमण पुष्टि भएको थियो । शनिबारै उनले सामाजिक सञ्जालमार्फत सामान्य लक्षण देखिएपछि परीक्षण गर्दा कोरोना भाइरसको संक्रमण पोजिटिभ पाइएको र गम्भीर लक्षण नभएकाले घरमै आइसोलेसनमा बसिरहेको जानकारी दिएका थिए ।
सोमबार शरीरमा अक्सिजनको मात्रा कम भएपछि उनी ह्याम्स अस्पताल भर्ना भएका हुन् । राष्ट्रिय टोलीका प्रशिक्षक जगत टमाटाले अस्पताल भर्ना भए पनि सन्दीपको अवस्था सामान्य रहेको जानकारी दिएका छन् ।
‘कोरोना संक्रमित भएपछि होटलकै आइसोलेसनमा थिए । आज राति श्वासप्रश्वासमा समस्या देखिएका कारण बिहान अस्पताल भर्ना भएका हुन् । उनको अवस्था सामान्य छ,’ टमाटाले सन्दीपसँग नियमित सम्पर्कमा रहेको बताएका छन् ।
कोरोना महामारीकै बीच आयोजित क्यारेबियन प्रिमियर लिग (सीपीएल) र इन्डियन प्रिमियर लिग (आईपीएल) क्रिकेट प्रतियोगिताबाट फर्किएका सन्दीप राष्ट्रिय टोलीको प्रशिक्षणमा सहभागी हुनेक्रममा थिए । छिट्टै उनी अस्ट्रेलियाको घरेलु ट्वान्टी–२० प्रतियोगिता बिगबास लिग खेल्न जाँदैछन् । बिगबास लिगमा यसपालि उनले होबर्ट हरिकेन्सबाट खेल्नेछन् । कान्तिपुर दैनिकमा खबर छ ।
