मुख्यमन्त्री पोखरेललाई मन्त्री पुनको जवाफ : ‘प्रचण्ड’को लिखित प्रस्ताव आउँदा किन उत्तेजित ?

उर्जा,जलस्रोत तथा सिंचाईमन्त्री वर्षमान पुनले लुम्बिनी प्रदेशका मुख्यमन्त्री शंकर पोखरेलको भनाइलाई लिएर प्रतिवाद गरेका छन् ।मुख्यमन्त्री पोखरेलले अध्यक्ष प्रचण्डले सचिवालय वैठकमा राखेको प्रस्तावले पार्टी एकता गम्भिर मोडमा पुगेको भन्दै फिर्ता लिन आग्रह गरेपछि मन्त्री पुनले त्यसको प्रतिवाद गरेका हुन् ।

नेकपाका स्थायी समिति सदस्य समेत रहेका नेता पुनले पार्टी सचिवालय बैठक प्रारम्भ र लिखित प्रस्तावले नयाँ बहसको सुरुवात भएको दावी गरेका छन् ।

उनले शनिवार सामाजिक संजाल फेसबुकमा स्टाटस लेख्दै पार्टीमा हुने छलफल ,बहस र अन्तर्विरोधबाट कोही आत्तिने वा मात्तिने गर्नु जनउत्तरदायी र क्रान्तिकारी पार्टीका नेता एवं कार्यकर्ताको जिम्मेवारी हुन नसक्ने बताएका छन् ।

यस्तो छ मन्त्री पुनको भनाइ

पार्टी सचिवालय बैठक प्रारम्भ र लिखित प्रस्तावले नयाँ बहसको सुरुवात भएकोछ र पार्टी भनेको जमेको पोखरी जस्तो होइन, हिमालबाट बग्ने तीब्र बेगको नदि जस्तो हो । पार्टीमा हुने छलफल ,बहस ,अन्तर्विरोधबाट कोही आत्तिने वा मात्तिने गर्नु जनउत्तरदायी र क्रान्तिकारी पार्टीका नेता एवं कार्यकर्ताको जिम्मेवारी हुनसक्दैन । पार्टी एकताको रक्षा तथा जनताको अपेक्षालाई आत्मसात गर्दै विनाउत्तेजना राजनीतिक बहसबाट पार्टीमा विधि,पद्धति र राजनीतिक सँस्कारको विकास गर्न सबै नेताहरुमा हार्दिक अनुरोध गर्दछु ।