भीमफेदी–कुलेखानी सुरुङमार्ग निर्माण २०७७ बाट सुरु हुने, अर्थ मन्त्रालयले गर्यो स्रोतको सुनिश्चितता
बाइलाइन नेपाल
हेटौंडा ।निजी क्षेत्रको कम्पनी नेपाल पूर्वाधार विकास कम्पनीले निर्माण गर्न नसकेको पोष्टबहादुर बोगटी सुरुङमार्ग (भीमफेदी–कुलेखानी) को काम अब बाग्मती प्रदेश सरकारले सुरु गर्ने भएको छ ।
प्रदेश सरकारले निर्माण गर्ने चर्चा भएपनि काम सुरु नभएको सुरुङमार्ग निर्माणका लागि स्रोत सुनिश्चितता गरेको पत्र आर्थिक मामिला तथा योजना मन्त्रालयले आईतबार भौतिक पूर्वाधार विकास मन्त्रालयलाई पठाएको छ ।
स्रोत सुनिश्चित भएसँगै बाग्मती प्रदेश सरकारले सुरुङमार्ग निर्माणको काम अगाडि बढाउने भएको छ । अर्थ मन्त्रालयले पठाएको पत्रमा तीनवटा आर्थिक वर्षमा मार्गको निर्माण गर्न बजेट उपलब्ध गराएको छ । जसमा सुरुङमार्ग निर्माण गर्न १९ अर्ब ३२ करोड ५ लाख ७६ रुपैयाँ लाग्ने अनुमान गरिएको छ ।
मन्त्रालयले आर्थिक वर्ष २०७७/०७८ मा २ अर्ब, आव २०७८/०७९ र २०७९/०८० मा ६, ६ अर्ब र आव २०८०/ ०८१ मा ४ अर्ब ७२ लाख ७ सय ७६ रुपैयाँ उपलब्ध गराउने उल्लेख गरेको छ । खरिदको विधि अन्तर्रा्ष्ट्रिय शिलबन्दी बोलपत्र मार्फत् गर्ने जनाइएको छ ।
यसैगरी, सुरुङमार्ग आयोजनाको सुरपरीवेक्षण परामर्श सेवाका लागि ५७ करोड ९८ हजार र मार्ग निर्माण गर्दा प्रभावित हुने क्षेत्रलाई मुआब्जा दिनका लागि समेत गरेर अर्थ मन्त्रालयले १९ अर्ब ३२ करोड ५ लाख ७६ रुपैयाँ लाग्ने अनुमान गरेको छ ।
प्रदेश सरकारले पोष्टबहादुर बोगटी भीमफेदी–कुलेखानी सुरुङमार्ग नामाकरण गरेर यसको निर्माणको तयारी थालेको दुई वर्ष भइसकेको छ । केही समय अघि बाग्मती प्रदेशका भौतिक पूर्वाधार विकास मन्त्री रामेश्वर फुँयालले भीमफेदी गाउँपालिका पुगेर सुरुङमार्ग निर्माण स्थलको निरीक्षण गर्दै २०७७ वैशाखबाट निर्माण सुरु हुने बताएका थिए ।
मार्ग निर्माणका लागि अहिले प्राविधिक अध्ययनको काम भइरहेको उल्लेख गर्दै मन्त्री फुँयालले जानकारी दिए । भीमफेदीदेखि कुलेखानीसम्म ३ दशमलव २ सय १५ किलोमिटर सुरुङ निर्माण हुनेछ । अहिले सुरुङमार्गको डीपीआर अन्तिम चरणमा रहेको जनाइएको छ ।-यसअघि १९ अर्ब हुनुपर्नेमा अन्यथा भएकाले सच्याइएको छ ।–सम्पादक
