नियम उल्लंघन गर्ने चालकलाई समेत ट्राफिक प्रहरीको ‘नमस्कार’ !
बाइलाइन नेपाल
पछिल्लो समय ‘नमस्कार’ विश्वभर लोकप्रिय बन्दै गएको छ । विश्वव्यापी रुपमा फैलिएको कोरना भाइरस संक्रमणको त्रासले नमस्कारको प्रचलन विश्वव्यापी बनेको हो ।
अहिले जहाँ-जहाँ कोरोना भाइरसको संक्रमण फैलिएको छ त्यहाँ त्यहाँ ‘नमस्कार’को प्रचलनले व्यापकता पाएको छ ।
मानिसहरु भेट हुँदा हात मिलाउने र अंकमाल गर्ने अवस्था नरहेपछि अहिले विश्वव्यापी रुपमा ‘नमस्कार’ले त्यसको ठाउँ लिएको हो ।
त्यसो त ‘नमस्कार’ अहिले स्वागत, सत्कारमा मात्र सीमित रहेको छैन, कारबाही गर्नुपरेमा समेत ‘नमस्कार’कै प्रयोग गर्न थालिएको छ ।
नेपालमा कोरोना भाइरसको सम्भावित जोखिमलाई मध्यनजर गर्दै महानगरीय ट्राफिक प्रहरी महाशाखाले ‘नमस्कार’ अभियानको थालनी गरेको हो ।
प्रहरी प्रशासनमा नमस्कार नौलो नभए पनि नियम उल्लंघन गर्नेलाई समेत ‘नमस्कार’ गर्न थालिएको घटना भने नितान्त नयाँ हो । अहिले ट्राफिक नियम उल्लंन गर्ने जो कोही चालकलाई कार्यस्थलमा ट्राफिक प्रहरीले पहिले ‘नमस्कार’ गर्छन् ।
सवारी नियम उल्लंघन गर्ने चालकलाई कारवाही गर्नुभन्दा पहिले ‘नमस्कार’ त्यसपछि मात्र आवश्यकताअनुसार कानूनी प्रक्रिया थालिने महाशाखाले जनाएको छ।
‘ट्राफिक कार्यालय र ट्राफिक प्रहरीहरूको सम्पर्कमा आउने सबै नागरिकहरूलाई नमस्कार शब्द प्रयोग गरिने महाशाखाका प्रमुख प्रहरी वरिष्ठ उपरीक्षक भिम प्रसाद ढकालले बताए।
‘आत्मीयता र सम्मान समेत प्रकट होस् भनेर नमस्कार शुरूवात गरका हौं’, उनले भने, ‘नेपालीको परम्परा नै हो, नयाँ कुरो होइन तर यसलाई पुनर्जागरण गर्न सके एकआपसमा श्रद्धासमेत बढ्नेछ।’
