कोरोनाका कारण २८ वटा सिनेमा हल सधैंका लागि बन्द

बाइलाइन नेपाल
२३ असार २०७८, बुधबार ०७:१८

१६ महिनादेखि जारी कोरोना संक्रमण महामारीका कारण एकपछि अर्को गर्दै सिनेमा हल बन्द हुन थालेका छन् । यो अवधिमा काठमाडौं उपत्यकाका ९ र उपत्यका बाहिरका १९ गरेर २८ वटा सिनेमा हल बन्द भइसकेका छन् ।

हल सञ्चालकको संस्था नेपाल चलचित्र संघको तथ्यांकअनुसार यी सिनेमा हल अब नखुल्ने गरी सधैंका लागि बन्द भएका हुन् । सिनेमा हलमा जडान गरिएका फिल्म प्रदर्शन गर्ने डीसीएन, क्युबजस्ता सर्वरसमेत सम्बन्धित कम्पनीलाई फिर्ता गरेर उनीहरूले सिनेमा हल बन्द गरेका छन् ।

कोरोना महामारीकै कारण सिनेमा हलको भविष्य अनिश्चित देखेर काठमाडौंको चाबहिलस्थित गोपीकृष्ण मुभिजले ७ वटामध्ये ४ वटा सिनेमा हल भत्काएको छ । गोपीकृष्ण मुभिज अन्तर्गतको गोपी, कृष्ण, राधा र मिरा गरी ४ वटा सिनेमा हल भत्काइएको सो हलका म्यानेजर प्रदीप दाहालले बताएका छन् ।

हल भत्काएर सो ठाउँमा गोपीकृष्णले यतिबेला गोपीकृष्ण मल निर्माण शुरू गर्दैछ । गोपीकृष्णले अब ओम, नम र शिवाय गरी ३ वटा सिनेमा हल मात्र सञ्चालन गर्ने पनि दाहालले बताएका छन् ।

क्यूएफएक्स सिनेमा कम्पनीले सो समूहका ३ वटा सिनेमा हल बन्द गरेको छ । काठमाडौंको हात्तीसारस्थित जयनेपाल सिनेमा घर र कमलपोखरीस्थित कुमारी सिनेमालाई क्यूएफएक्सले बन्द गरेको हो । जय नेपाल सिनेमा घर नेपालकै अहिलेसम्मको जेठोमध्येको सिनेमा घर पर्छ । कुमारी सिनेमाले पनि ४ दशकभन्दा लामो इतिहास बोकिसकेको छ । यसरी लामो इतिहास बोकेका सिनेमा घर कोरोनाको महामारीकै कारण बन्द गर्नुको विकल्प नरहेको क्यूएफएक्स सञ्चालकको भनाइ छ ।

काठमाडौंको बालाजुमा रहेको गंगा चलचित्र मन्दिर पनि कोरोना महामारीकै कारण सधंैका लागि बन्द भएको छ । यो सिनेमा हलमा गंगा ‘क’ र गंगा ‘ख’ गरी २ वटा फिल्म हल रहेको थियो । यी दुवै हल सधंैका लागि बन्द गर्न बाध्य भएको सो हलका सञ्चालक मदनमान बज्राचार्यले बताएका छन् ।

३ दशक लामो इतिहास बोकेको सिनेमा हल बन्द गर्नुपर्दा आफूलाई निकै दुःख लागेको बज्राचार्यले बताएका छन् । तर सिनेमाको व्यापार कहिलेबाट सुरु हुने भन्ने निश्चित नरहेको र भाडा तिरेर हल राख्न सक्ने अवस्था नभएकै कारण यसलाई सधंैका लागि बन्द गर्नुको विकल्प नरहेको पनि बज्राचार्यको दुखेसो छ ।

कोरोना संक्रमणका कारण अनिश्चित भविष्य देखेरै काठमाडौं उपत्यकाका ९ वटा सिनेमा हल बन्द गरिएको नेपाल चलचित्र संघका अध्यक्ष मधुसूदन प्रधानले बताएका छन् । प्रधानका अनुसार काठमाडौं उपत्यकाबाहिरका सिनेमा हल पनि कोरोनाको महामारीपछि धमाधम बन्द भएका छन् ।

मोफसलका १९ वटा सिनेमा हल भत्काइँदैछ । बिर्तामोडको कृष्ण टाँकिज, धुलावारीको तृष्ण हल, मोरङको सुकुना सिनेमा हल, विराटनगरको बाबा चलचित्र मन्दिर, धनकुटाको केटिवी सिनेमा हल, इनरुवाको कमल टाँकिज, जनकपुरको मिलन फिल्म हल र लवकुश फिल्म हल भत्काउन लागिएको हो ।

चितवन टाँडीको नारायणी चलचित्र मन्दिर, नवलपुरको गणपति चलचित्र मन्दिर, बर्दघाटको मोहिनी चलचित्र मन्दिर, कैलालीस्थित पहलवानपुरको सिनेमा हल, दाङस्थित लमहीको सिनेमा हल, तुलसीपुरस्थित बिष्णु टाँकिज, पाल्पाको सन्तोष चलचित्र मन्दिर, बाग्लुङको कालिगण्डकी चलचित्र मन्दिर, नुवाकोटको त्रिशूलीमा रहेको सिनेमा हल र तनहुँको दमौलीमा रहेका उत्तरशिला हल, कुस्माको सिद्धेश्वर हल पनि बन्द भएको अध्यक्ष प्रधानले बताएका छन् ।

यी सबै सिनेमा हलले नेपाल चलचित्र संघ र चलचित्र विकास बोर्डमा पत्र पठाएर सधंैका लागि बन्द गरिएको जानकारी गराएका छन् । सरकारले सही नीति नल्याएको खण्डमा एक वर्षभित्र अझै अहिलेको भन्दा दोब्बर संख्यामा सिनेमा हल बन्द हुने अध्यक्ष प्रधानको भनाइ रहेको छ । यो आर्थिक वर्षमा सिनेमा हललाई विद्युत् शुल्क मिनाहा गर्ने घोषणा बजेटमा गरिए पनि अझै मिनाहा नगरिएको गुनासो अध्यक्ष प्रधानको रहेको छ ।

नेपाल चलचित्र संघका महासचिव तथा प्रवक्ता अशोक शर्माले कोरोना महामारीको अवस्था यसरी नै अझै केही वर्ष जाने हो भने सबै सिनेमा हल बन्द भएर भत्काउनुपर्ने अवस्था आउने बताए । कोरोनाको समयमा सबैभन्दा चाँडो बन्द हुने र सबैभन्दा ढिलो खुल्ने तर दर्शक नआउने व्यवसाय सिनेमा हल नै भएको पनि उनको कथन छ । सोही कारण नेपाली सिनेमा हलको भविष्य कोरोनाका कारण अनिश्चित रहेको उनले बताए ।

यसमा तपाइको मत

Your email address will not be published. Required fields are marked *


*